OLIYGOH.UZ

O'zbekiston oliygohlari

Abituriyentga eslatma

Abituriyent o'qishga kirishdan oldin ta'lim muassasasi qabul komissiyasiga kerakli hujjatlarni topshiradi.

Muddatli harbiy xizmatni o'tagan va harbiy qism tavsiyanomasiga ega bo'lgan abituriyentlar tegishli tavsiyanomani ta'lim muassasasi qabul komissiyasiga 20-iyulgacha taqdim etadilar, undan keyin topshirilgan tavsiyanoma qabul qilinmaydi.

Maxsus sirtqi bo'limlarga o'rta maxsus ma'lumotga va tegishli ta'lim turi bo'yicha kamida uch yil amaliy ish stajiga ega bo'lganlardan hujjatlar qabul qilinadi. Maxsus sirtqi bo'limlarga kiruvchilardan mehnat daftarchasining belgilangan tartibda tasdiqlangan ko'chirmasi talab etiladi.

Abituriyent qabul komissiyasiga pasport va harbiy xizmatga aloqadorligi haqidagi hujjatini shaxsan ko'rsatadi.

Abituriyent hujjatlarining to'liqligi tekshirilgandan so'ng web kamera orqali suratga tushiriladi va hujjatlari qabul qilinadi. Suratga tushirish uchun alohida burchak yoki xonalar tashkil etiladi. Ushbu surat abituriyentlar bazasiga kiritiladi va DTMga yuboriladi. Suratga tushmagan abituriyentning hujjatlari qabul qilinmaydi. Abituriyentlar tomonidan qayd etilgan talablar bajarilganda ularning hujjatlarini qabul qilish rad etilmaydi. Abituriyentga hujjatlari qabul qilinganligi to'g'risida tilxat beriladi.

Abituriyent 26-iyuldan qabul komissiyasi tomonidan e'lon qilingan binolar va auditoriyalarning reja-chizmalarini diqqat bilan o'rganib, test topshiradigan binoning qayerda joylashganligi, auditoriyaning tartib raqami va qaysi qavatda ekanligini bilib oladi. Abituriyentlar guruh tartib raqami (auditoriya tartib raqami bilan mos) ko'rsatilgan ruxsatnomani 27-iyuldan boshlab ta'lim muassasasi qabul komissiyasidan oladi.

Kunduzgi, maxsus sirtqi ta'lim yo'nalishlari bo'yicha test sinovlari, Qabul to'g'risidagi nizomga asosan 3 tilda, o'zbek, qoraqalpoq (Qoraqalpog'iston Respublikasida) va rus tillarida, O'zbekiston Respublikasining barcha hududlarida 10-iyul (harbiy oliy ta'lim muassasalarida) va 1-avgust kuni bir vaqtda o'tkaziladi.

Test sinovlari o'tkaziladigan kuni abituriyentlarni binoga kiritish soat 7.30 da boshlanadi. Abituriyent binoga kirishda ruxsatnoma va pasportini shaxsan ko'rsatadi. Soat 8.00 dan boshlab abituriyentlar o'z guruhlari raqamiga mos raqamlangan auditoriyaga kiradilar.

Qabul komissiyasi test sinovlari o'tkaziladigan binoga abituriyentlar tomonidan mikrokalkulyator, lug'at, jadval, kitob, uyali telefon, aloqa vositalari, shpargalka va shu kabilarini olib kirish harakatini aniqlagan holda abituriyentning ruxsatnomasi olib qo'yiladi, dalolatnoma yoziladi (ixtiyoriy shaklda) unga OTM qabul komissiya a'zosi imzo qo'yadi. Abituriyent test sinovlariga qo'yilmaydi.

Test jarayoni boshlangandan so'ng (8.30 dan keyin) abituriyent auditoriyaga kiritilmaydi.

Test sinovlariga kelmagan abituriyentlar uchun qo'shimcha test sinovlari o'tkazilmaydi.

Abituriyent test sinovlarini ta'lim muassasasida o'qiydigan tilda va yozuvda (kirill, lotin) topshiradi.

Savollar kitobi va javoblar varag'ini olgandan so'ng, javoblar varag'i varianti bilan savollar kitobi varianti mosligini har bir fan bo'yicha sinchiklab tekshirib chiqadi. Savollar kitobining fanlar bo'yicha test topshiriqlarida tipografik xato yoki boshqa sabablarga ko'ra to'la nashr qilinmagan o'rinlar yoki betlar va shunga o'xshash xatolar bo'lsa, darhol auditoriya rahbariga xabar beradi va nuqsonsiz test savollari kitobi hamda javoblar varag'ini oladi (agar abituriyent soat 9.00 gacha savollar kitobidagi nuqsonlar haqida auditoriya rahbariga xabar bermasa, uning murojaati qabul qilinmaydi). Savollar kitobining tegishli joyiga o'z familiyasi, ismi va otasining ismini yozib, imzo qo'yadi. Abituriyent savollar kitobi va javoblar varag'ining "Abituriyentlar diqqatiga" qismini o'qib chiqishi va belgilangan qoidalarni bajarishi shart.

Javoblar varag'ini to'ldirishda abituriyent faqat ko'k (havorang) pastali sharikli ruchkadan foydalanadi. Flomaster, siyohli avtoruchka va gelli ruchkalardan foydalanish man etiladi.

Abituriyent o'zi haqidagi ma'lumotlarni javoblar varag'ining tegishli qismiga titul varag'idan ko'chirib yozadi va imzo qo'yadi. Javoblar varag'i raqamini titul varag'i va ruxsatnomasidagi mos kataklarga ko'chirib yozadi.

Pasporti seriyasi va raqamini, maxsus kodini, ta'lim muassasasi kodini va tanlov kodini javoblar varag'ining mos joylariga titul varag'idan ko'chiradi va doirachalarni mos ravishda bo'yaydi.

Titul varag'i va ruxsatnomasiga auditoriya rahbari va kuzatuvchilarini familiyasi, ismi va otasining ismini yozuv taxtasidan (doska) ko'chirib yozadi.

Har bir fan bo'yicha javoblarni mos ravishda o'z joyiga belgilaydi. Chet tili bo'yicha test topshirayotgan abituriyent mos kelgan tilga tegishli doirachani bo'yashi shart.

Har bir test topshirig'iga faqat bitta javob belgilanadi. Agar bitta topshiriqqa ikki yoki undan ko'p javob belgilansa, ushbu topshiriqqa ball berilmaydi.

Javoblarni tanlash uchun 108 ta savolga 3 soat, 72 ta savolga 2 soat vaqt beriladi.

Javoblarni tanlash-ixtiyoriy. Abituriyent o'zi tanlagan javoblarini javoblar varag'ining tegishli blokiga mos ravishda ko'chiradi. Buning uchun testga ajratilgan vaqtdan tashqari 20 daqiqa vaqt beriladi.

To'ldirilgan javoblar varag'i abituriyentning bilim darajasini belgilovchi asosiy hujjatdir.

Javoblar varag'ining to'g'ri to'ldirilishi uchun abituriyent shaxsan javobgardir.

Javoblar varag'ida tegishli doirachalarni noto'g'ri belgilagan, javoblar varag'ini almashtirgan, fan bloklari o'rnini almashtirib bo'yagan, javoblar varag'ining tegishli bloklarida familiyasi, ismi va otasining ismi, ta'lim muassasasi kodi, maxsus kodi, tanlov kodi, pasport seriyasi va raqamini yozmagan hamda imzo qo'ymagan, titul varag'iga javoblar varag'i raqamlarini yozmagan yoki undagi raqamlarni bo'yagan abituriyentlarning e'tirozi ko'rib chiqilmaydi.

Test sinovi tugagunga qadar abituriyentlarning auditoriyadan chiqishi taqiqlanadi. Auditoriyadan chiqqan abituriyentlar qaytadan test sinovlariga qo'yilmaydi.

Test sinovini belgilangan muddatdan oldin tugatgan abituriyent savollar kitobi, javoblar varag'i va titul varag'ini auditoriya rahbariga topshiradi, abituriyentlar ro'yxatidagi o'z familiyasi to'g'risiga testni tugatgan vaqtini yozadi va o'z joyiga borib o'tiradi. Agar u boshqa abituriyentlarga yordam bersa yoki ularning ishlashiga xalaqit bersa, unga ham test sinovidan chetlashtirish haqida dalolatnoma tuziladi va dalolatnoma javoblar varag'iga yelimlanadi.

Abituriyentlar auditoriyada test sinovlarini topshirish qoidalari buzilganligi to'g'risida auditoriya rahbari va kuzatuvchisiga murojaat qilishlari mumkin.

Abituriyent tomonidan savollar kitobi varag'i yirtib olinganligi aniqlansa, test sinovlarini topshirish qoidalari buzilgan hisoblanadi va test sinovidan chetlashtiriladi. Ushbu haqda dalolatnoma tuzilib, javoblar varag'iga yelimlanadi.

Test sinovidan chetlashtirilganlarning javoblar varag'i o'qilmaydi va unga ball berilmaydi.

Abituriyent javoblar varag'ining tegishli joyini bo'yash bilan auditoriyadagi test jarayonining borishiga o'z fikrini bildirishi mumkin.

Test sinovlari uchun ajratilgan vaqt tugagandan so'ng, auditoriya rahbari test sinovi tugaganligini rasman e'lon qiladi. Abituriyentlarning barcha test materiallari: savollar kitobi, javoblar varag'i va titul varaqlarini auditoriya rahbari va kuzatuvchisi yig'ib oladi. Bu vaqtda hamma abituriyent o'z joyida o'tiradi. Test materiallarini o'z vaqtida topshirmagan abituriyentlar uchun belgilangan tartibda dalolatnoma tuziladi va uning javoblar varag'iga yelimlanadi.

Auditoriya rahbari va kuzatuvchisi test materiallarini sanab qutiga joylashtiradi va qutidagi shaklda belgilangan joyga ikki abituriyent ham imzo qo'yadi.

O'tkazilgan test sinovlari bo'yicha fuqarolarning murojaatlarini ko'rib chiqish maqsadida Davlat test markazida murojaatlarni ko'rish komissiyasi (keyingi o'rinlarda - Komissiya) tashkil etiladi.

Komissiya tarkibiga Davlat test markazining mas'ul xodimlari va fanlar bo'yicha ekspertlari kiritiladi. Komissiyaning tarkibi Davlat test markazi direktori tomonidan tasdiqlanadi.

Murojaat etuvchi test javoblari e'lon qilingan kundan boshlab bir oy davomida Komissiyaga yozma ravishda murojaat qilishi mumkin. Uning arizasi ro'yxatga olingan kundan boshlab 10 kun ichida ko'rib chiqilishi lozim (harbiy ta'lim muassasalari abituriyentlarining e'tirozlari ham ta'lim muassasalarining abituriyentlari e'tirozlari bilan bir vaqtda ko'riladi).

Ariza murojaat etuvchi ishtirokida ko'rib chiqiladi. Ko'rib chiqish jarayonida murojaat etuvchining ota-onasidan biri shaxsini tasdiqlovchi hujjatini ko'rsatgan holda qatnashishga haqli. Murojaat etuvchi komissiyaga pasporti va ruxsatnomasi bilan belgilangan kuni kelishi shart.

Arizani ko'rib chiqish jarayonida murojaat etuvchiga uning javoblar varag'i ko'rsatiladi va unga test sinovida yo'l qo'ygan noto'g'ri javoblari ro'yxati bilan birgalikda testda tushgan savollar kitobining nusxasi beriladi.

Murojaatni ko'rib chiqish natijasi bo'yicha bayonnoma tuziladi va Komissiya a'zolari hamda murojaat etuvchi tomonidan imzolanadi.

Komissiya xulosasi bo'yicha ma'lumot O'zbekiston Respublikasi ta'lim muassasalariga qabul qilish bo'yicha Davlat komissiyasiga taqdim etiladi.

Murojaat etuvchi o'z huquqlarini himoya qilishni so'rab boshqa davlat idoralariga murojaat qilishga haqli.

Bakalavr ta'lim yo'nalishlariga:

Abituriyentlarning o'qishga qabul qilish haqidagi arizalari oliy ta'lim muassasalari qabul komissiyalari tomonidan 20 iyundan 20 iyulgacha (shu kuni ham), O'zbekiston davlat konservatoriyasi uchun 20 iyundan 15 iyulgacha qabul qilinadi. Abituriyent oliy ta'lim muassasasi qabul komissiyasiga quyidagi hujjatlarni taqdim etadi:

  • rektor nomiga ariza;
  • o'rta ta'lim (11-sinf negizida) yoki o'rta maxsus, kasb-hunar ta'limi muassasasini tugatganligi haqidagi hujjatning (diplom) asl nusxasi;
  • 086/U - shakl bo'yicha tibbiy ma'lumotnoma;
  • pasport (pasport yoshiga yetmaganlar uchun tug'ilganligi to'g'risidagi guvohnoma)ning nusxasi;
  • 3.5 x 4.5 sm hajmdagi 6 dona rangli fotosurat;
  • harbiy qism tavsiyanomasi (agar mavjud bo'lsa);
  • tanlovdan tashqari o'qishga kirish huquqiga ega bo'lgan Xalqaro va Respublika olimpiadalari, tanlovlar va musobaqalar g'oliblari asl nusxadagi tasdiqlovchi hujjatlar (agar mavjud bo'lsa);
  • mehnat daftarchasidan belgilangan tartibda tasdiqlangan ko'chirma va ishlab turgan sohadan tavsiyanoma (maxsus sirtqi bo'lim abituriyentlari uchun);
  • abituriyent tomonidan pasport (pasport yoshiga yetmaganlar tug'ilganligi to'g'risidagi guvohnoma) hamda harbiy xizmatga aloqadorligi haqidagi hujjat qabul komissiyasiga shaxsan ko'rsatiladi.

Magistratura mutaxassisligiga:

Magistraturaga kirishda abituriyentlarning (bakalavr darajasiga ega bo'lganlar, diplomli mutaxassislar) hujjatlari 1 iyuldan 30 iyulgacha qabul qilinadi. Abituriyentlar oliy ta'lim muassasasi qabul komissiyasiga quyidagi hujjatlarni taqdim etadilar:

  • rektor nomiga ariza;
  • oliy ma'lumot to'g'risidagi hujjatning asl nusxasi (yoki diplomdan ko'chirma - O'zbekiston Respublikasi oliy ta'lim muassasalarini davlat granti bo'yicha o'qib tugatganlar uchun) hamda unga ilova;
  • chop etilgan ilmiy maqola yoki tezislari (yoki ularga tenglashtirilgan hujjatlari) nusxasi (agar mavjud bo'lsa);
  • 3.5 x 4.5 hajmdagi 6 dona rangli fotosurat;
  • 086/U - shakldagi tibbiy ma'lumotnoma;
  • hujjatlar taqdim etilishi jarayonida abituriyentlar pasport va harbiy xizmatga aloqadorlik haqidagi hujjatlarini shaxsan ko'rsatadilar.

Ikkinchi va undan keyingi oliy (o'rta maxsus, kasb-hunar) ma'lumotga:

Ikkinchi va undan keyingi oliy (o'rta maxsus, kasb-hunar) ma'lumot olmoqchi bo'lgan shaxslar ta'lim muassasasining qabul komissiyasiga quyidagi hujjatlarni taqdim etadilar:

  • rektor nomiga ariza;
  • oliy (o'rta maxsus, kasb-hunar) ma'lumot to'g'risida davlat namunasidagi diplom (asl nusxasi) ilovasi bilan (xorijiy davlatlar ta'lim muassasalarining 1992 yil 1 yanvardan keyin berilgan diplomlari o'rnatilgan tartibda nostrifikatsiyadan o'tkazilgan bo'lishi lozim);
  • 3.5 x 4.5 hajmdagi 6 dona rangli fotosurat;
  • 086/U - shakldagi tibbiy ma'lumotnoma;
  • pasport va harbiy xizmatga aloqadorligi haqidagi hujjat nusxasi shaxsan ko'rsatiladi.

Abituriyent tomonidan topshirilgan hujjatlarning qalbakiligi aniqlansa, u holda abituriyent test sinovlaridan (oliy ta'lim muassasasidan) chetlashtiriladi hamda hujjatlari o'rnatilgan tartibda huquqni muhofaza qilish organlariga yuboriladi.

Harbiy xizmatni o'tab, harbiy qismlar qo'mondonligining tavsiyanomalariga ega abituriyentlar uchun:

O'zbekiston Respublikasi Prezidentining "O'zbekiston Respublikasi Qurolli Kuchlari safida muddatli harbiy xizmatni o'tab bo'lgan fuqarolarga imtiyozlar tizimini takomillashtirishga oid qo'shimcha chora-tadbirlar to'g'risida" 2012 yil 31 maydagi PQ-1765-son qaroriga asosan muddatli harbiy xizmatni o'tab bo'lgan, harbiy qismlar qo'mondonligining tavsiyanomalariga ega bo'lgan barcha fuqarolarga Respublikaning barcha oliy ta'lim muassasalari bakalavriat ta'lim yo'nalishlariga kirishda to'plash mumkin bo'lgan eng ko'p ballning 27 foizi (61.2 ball) miqdorida qo'shimcha ball shaklidagi imtiyoz beriladi.

Abituriyentning to'plagan ballari uning arizasida ko'rsatilgan birinchi oliy ta'lim muassasasi bo'yicha davlat granti yoki to'lov-kontrakt asosida o'qishga qabul qilishga yetarlicha bo'lgan taqdirda, uning test sinovi natijalari ushbu oliy ta'lim muassasasida e'lon qilinadi va unga arizasida ko'rsatilgan ikkinchi oliy ta'lim muassasasi ta'lim yo'nalishi bo'yicha tanlovda ishtirok etishiga ruxsat etilmaydi.

Zulfiya nomidagi Davlat mukofotlari sohibalari uchun:

O'zbekiston Respublikasi Prezidentining "Zulfiya nomidagi Davlat mukofotini ta'sis etish bo'yicha takliflarni qo'llab-quvvatlash to'g'risida" 1999 yil 10 iyundagi PF-2326-son Farmoniga muvofiq Zulfiya nomidagi Davlat mukofotlari sohibalari bo'lgan umumiy o'rta, o'rta maxsus, kasb-hunar ta'limi muassasalari o'quvchilari mos ta'lim yo'nalishlari bo'yicha oliy ta'lim muassasalariga tanlovdan tashqari test sinovlarisiz va kasbiy (ijodiy) imtihonlarsiz davlat grantlari asosida qabul qilinadilar.

Xalqaro va Respublika olimpiadalari, tanlovlari, musobaqalari g'oliblari uchun:

O'zbekiston Respublikasi Prezidentining "O'zbekiston o'quvchi yoshlarini rag'batlantirish choralari to'g'risida" 1993 yil 5 fevraldagi PF-555-son Farmoniga muvofiq hamda Vazirlar Mahkamasining "O'zbekiston iqtidorli yoshlarini taqdirlash va moddiy rag'batlantirish to'g'risida" 2008 yil 13 oktyabrdagi 226-son qarori bilan tasdiqlangan Xalqaro va Respublika olimpiadalari, tanlovlari, musobaqalari g'oliblari bo'lgan akademik litseylar, kasb-hunar kollejlari va umumiy o'rta ta'lim muassasalari o'quvchilarini taqdirlash tartibi to'g'risidagi Nizom hamda Respublika olimpiadalari, tanlovlari va sport musobaqalarini o'tkazish to'g'risidagi Nizomlar asosida Xalqaro va Respublika olimpiadalari, tanlovlari va musobaqalari g'oliblari hamda Oliy va o'rta maxsus ta'lim vazirligining O'rta maxsus, kasb-hunar ta'limi markazi ta'sis etadigan maxsus guvohnomani olganlar Davlat komissiyasining qarori bilan tegishli oliy ta'lim muassasalarining mos ta'lim yo'nalishlariga tanlovdan tashqari test sinovlarisiz va kasbiy (ijodiy) imtihonlarsiz davlat grantlari asosida qabul qilinadilar.

O'zbekiston Respublikasi Xalq ta'limi vazirligi, Sog'liqni saqlash vazirligi, Madaniyat va sport ishlari vazirligi va tegishli vazirliklar, idoralar tomonidan har yili o'tkaziladigan pedagogika o'rta maxsus, kasb-hunar ta'lim muassasalari bitiruvchilari va ta'lim muassasalari tarbiyalanuvchilarining "Tarbiyachi" respublika tanlovi g'olibi, tibbiyot muassasalari hamshiralarining "Hamshira" respublika tanlovi g'olibi, Badiiy akademiyaning tasviriy san'at bo'yicha respublika tanlovi g'oliblari, "Nihol" mukofoti sovrindorlari mazkur vazirliklar, idoralar va jamg'armalar taqdimnomalariga muvofiq Davlat komissiyasining qarori bilan tegishli oliy ta'lim muassasalariga, mos ta'lim yo'nalishlariga tanlovdan tashqari test sinovlarisiz va kasbiy (ijodiy) imtihonlarsiz davlat grantlari asosida qabul qilinadilar.

Olimpiada fani, tanlovlar bilan oliy ta'lim yo'nalishlari o'rtasidagi kasbiy muvofiqlik Oliy va o'rta maxsus ta'lim vazirligi, Xalq ta'limi vazirligi hamda Madaniyat va sport ishlari vazirligi tomonidan ishlab chiqiladi va Davlat komissiyasi tomonidan tasdiqlanadi.

Oliy ta'lim muassasalari qabul komissiyalari olimpiadalar, tanlovlar va musobaqalar g'oliblarining arizalari haqidagi ma'lumotlarni, ta'lim yo'nalishi, o'quv shakli va tili ko'rsatilgan holda, O'zbekiston Respublikasi Vazirlar Mahkamasi huzuridagi Davlat test markazi orqali Davlat komissiyasiga 22 iyulgacha bo'lgan muddatda taqdim etadilar. Davlat komissiyasi 31 iyulgacha g'olib bo'lganlar bo'yicha tegishli vazirliklar, idoralarning taqdimnomasi asosida alohida qaror qabul qiladi.

2015-2016 o'quv yili uchun Respublika oliy ta'lim muassasalarida bitta talabani bir yillik o'qitish qiymati
BAKALAVRIAT
Ta'lim sohasi va yo'nalishlari Kunduzgi ta'lim Maxsus sirtqi
I. Gumanitar soha
O'qituvchilar tayyorlash va pedagogik fanlar, jumladan kasbiy ta'lim5 800 000
San'at6 850 0002 700 000
Gumanitar fanlar5 800 000
shu jumladan:
     sharq filologiyasi, turkiy tillar filologiyasi, roman-german filologiyasi6 300 000
     xalqaro munosabatlar8 550 000
Hayot haqidagi fanlar, tabiiy fanlar5 800 000
Matematika va statistika, amaliy matematika va informatika5 800 000
II. Ijtimoiy soha, iqtisod va huquq
Ijtimoiy va ahloqiy fanlar5 800 000
Jurnalistika va axborot6 300 000
Iqtisodiyot va biznes7 650 000
     shu jumladan: jahon iqtisodiyoti va xalqaro iqtisodiy munosabatlar8 550 000
Huquq8 550 000
III. Ishlab chiqarish va texnik soha
Muhandislik va muhandislik ishi, ishlab chiqarish va qayta ishlash tarmoqlari5 800 0001 940 000
Axborot texnologiyalari va axborot xavfsizligi6 300 0002 300 000
Arxitektura6 850 000
Qurilish6 300 000
IV. Qishloq va suv xo'jaligi
Qishloq va suv xo'jaligi5 800 000
V. Sog'liqni saqlash va ijtimoiy ta'minot
Sog'liqni saqlash7 650 000
Ijtimoiy ta'minot5 800 000
VI. Xizmatlar sohasi
Xizmat ko'rsatish sohasi6 300 000
     shu jumladan: sport faoliyati5 800 000
Transport6 300 000
Atrof muhit muhofazasi, hayotiy faoliyat xavfsizligi5 800 000
2015-2016 o'quv yili uchun Respublika oliy ta'lim muassasalarida bitta talabani bir yillik o'qitish qiymati
MAGISTRATURA
Ta'lim sohasi va yo'nalishlari Qiymat
I. Gumanitar soha
O'qituvchilar tayyorlash va pedagogik fanlar, jumladan kasbiy ta'lim6 290 000
San'at7 570 000
Gumanitar fanlar6 290 000
shu jumladan:
     sharq filologiyasi, turkiy tillar filologiyasi, roman-german filologiyasi6 910 000
     xalqaro munosabatlar9 400 000
Hayot haqidagi fanlar, tabiiy fanlar6 290 000
Matematika va statistika, amaliy matematika va informatika6 290 000
II. Ijtimoiy soha, iqtisod va huquq
Ijtimoiy va ahloqiy fanlar6 290 000
Jurnalistika va axborot6 910 000
Iqtisodiyot va biznes8 400 000
     shu jumladan: jahon iqtisodiyoti va xalqaro iqtisodiy munosabatlar9 400 000
Huquq9 400 000
III. Ishlab chiqarish va texnik soha
Muhandislik va muhandislik ishi, ishlab chiqarish va qayta ishlash tarmoqlari6 290 000
Axborot texnologiyalari va axborot xavfsizligi6 910 000
Arxitektura7 570 000
Qurilish6 910 000
IV. Qishloq va suv xo'jaligi
Qishloq va suv xo'jaligi6 290 000
V. Sog'liqni saqlash va ijtimoiy ta'minot
Sog'liqni saqlash8 400 000
Ijtimoiy ta'minot6 290 000
VI. Xizmatlar sohasi
Xizmat ko'rsatish sohasi6 910 000
     shu jumladan: sport faoliyati6 290 000
Transport6 910 000
Atrof muhit muhofazasi, hayotiy faoliyat xavfsizligi6 290 000
2015-2016 o'quv yili uchun Respublika oliy ta'lim muassasalarida bitta talabani bir yillik o'qitish qiymati
IKKINCHI TA'LIM
Ta'lim sohasi va yo'nalishlari Qiymat
I. Gumanitar soha
O'qituvchilar tayyorlash va pedagogik fanlar, jumladan kasbiy ta'lim6 290 000
San'at7 570 000
Gumanitar fanlar6 290 000
shu jumladan:
     sharq filologiyasi, turkiy tillar filologiyasi, roman-german filologiyasi6 910 000
     xalqaro munosabatlar9 400 000
Hayot haqidagi fanlar, tabiiy fanlar6 290 000
Matematika va statistika, amaliy matematika va informatika6 290 000
II. Ijtimoiy soha, iqtisod va huquq
Ijtimoiy va ahloqiy fanlar6 290 000
Jurnalistika va axborot6 910 000
Iqtisodiyot va biznes8 400 000
     shu jumladan: jahon iqtisodiyoti va xalqaro iqtisodiy munosabatlar9 400 000
III. Ishlab chiqarish va texnik soha
Muhandislik va muhandislik ishi, ishlab chiqarish va qayta ishlash tarmoqlari6 290 000
Axborot texnologiyalari va axborot xavfsizligi6 910 000
Arxitektura7 570 000
Qurilish6 910 000
IV. Qishloq va suv xo'jaligi
Qishloq va suv xo'jaligi6 290 000
V. Sog'liqni saqlash va ijtimoiy ta'minot
Sog'liqni saqlash8 400 000
Ijtimoiy ta'minot6 290 000
VI. Xizmatlar sohasi
Xizmat ko'rsatish sohasi6 910 000
     shu jumladan: sport faoliyati6 290 000
Transport6 910 000
Atrof muhit muhofazasi, hayotiy faoliyat xavfsizligi6 290 000

Kasbiy (ijodiy) imtihonlar test sinovlari o'tkazilishiga qadar 11 iyuldan 25 iyulgacha, test majmualarida fanning o'rniga qarab uning uchun nazarda tutilgan eng ko'p ballning (tegishli ravishda 75,6 ball yoki 39,6 ball) 0 dan 100 foizigacha bo'lgan oraliqda yagona ko'p balli baholash tizimi bo'yicha amalga oshiriladi.

Kasbiy (ijodiy) imtihonlar natijalari bo'yicha tushgan norozilik (apellyatsiya) arizalari oliy ta'lim muassasasi qabul komissiyasi tomonidan 26 iyulga qadar bo'lgan muddatda ko'rib chiqiladi.

Kasbiy (ijodiy) imtihonlar natijalari Davlat komissiyasiga oliy ta'lim muassasalari tomonidan 27 iyulgacha taqdim etiladi.

Kasbiy (ijodiy) imtihonlarning natijalari haqidagi ma'lumotlar oliy ta'lim muassasalari qabul komissiyalari tomonidan Davlat test markaziga belgilangan shakllarda kunduzgi va maxsus sirtqi bo'limlar uchun - 1 avgustda taqdim etiladi.


Kasbiy (ijodiy) imtihonlarni o'tkazish tartibi:

1. Oliy ta'lim muassasalarida yagona ko'p balli baholash tizimi bo'yicha kasbiy (ijodiy) imtihonlar test sinovlari boshlangunga qadar Davlat komissiyasi belgilagan muddatlarda o'tkaziladi.

2. Test sinovlariga qo'shimcha tarzda nazarda tutilgan kasbiy (ijodiy) imtihonlar Davlat komissiyasi tasdiqlagan ta'lim yo'nalishlari ro'yxati bo'yicha o'tkaziladi.

3. Kasbiy (ijodiy) imtihonlarning bosh maqsadi abituriyentlarning tanlangan mutaxassislik bo'yicha o'qish va keyinchalik ishlab ketish imkoniyatlarini aniqlash, ularning tanlangan fanlar bo'yicha bilimlari va malakalari darajalarini, kasbiy ko'nikmalarini, ijodiy va jismoniy qobiliyatlarini baholashdir.

4. Imtihonlar savollari va topshiriqlarining mazmuni umumiy o'rta ta'lim va o'rta maxsus, kasb-hunar ta'limi muassasalari dasturlariga qat'iy muvofiqlashtirilgan bo'lishi lozim. Sport fanlari bo'yicha imtihonlar topshiriqlari abituriyentlarning alohida toifalari uchun (jinsi va yoshi bo'yicha) belgilangan me'yoriy talablarga muvofiq tuziladi.

5. Abituriyentlardan kasbiy (ijodiy) imtihonlar qabul qilish uchun oliy ta'lim muassasasida fan bo'yicha imtihon komissiyasi tashkil etiladi. Oliy ta'lim muassasasida kasbiy (ijodiy) imtihonlarni tashkil etish va o'tkazish quyidagi tartibda amalga oshiriladi:

  • imtihonlar boshlanishidan bir oy oldin rektorning buyrug'i bilan oliy ta'lim muassasasida tegishli fanlar bo'yicha imtihonlarni tashkil etish va qabul qilish masalalari bo'yicha tajribali, malakali va mas'uliyatli o'qituvchilar tarkibidan fan bo'yicha imtihon komissiyasi tashkil etiladi;
  • ayrim hollarda oliy ta'lim muassasasi fan bo'yicha imtihon komissiyasi tarkibiga boshqa ta'lim muassasalari o'qituvchilari va ilmiy-tadqiqot muassasalari xodimlarining asosiy ish joyi ma'muriyatining tavsiyalariga binoan kiritilishiga yo'l qo'yiladi;
  • oliy ta'lim muassasasi idoraviy bo'ysunishiga qarab vazirlik (idora) bilan kelishgan holda fan bo'yicha imtihon komissiyasining raisligiga nomzodni o'z vaqtida tasdiqlash uchun O'zbekiston Respublikasi Oliy va o'rta maxsus ta'lim vazirligiga taqdim etadi;
  • "Oliy hamshiralik ishi" yo'nalishi bo'yicha imtihon komissiyalarining raislari O'zbekiston Respublikasi Sog'liqni saqlash vazirligi tomonidan tasdiqlanadi;
  • imtihonlar tasdiqlangan jadvalga qat'iy rioya etilgan holda o'tkaziladi;
  • imtihonlarga ajratiladigan vaqt oliy ta'lim muassasasi qabul komissiyasining qarori bilan belgilanadi;
  • abituriyentlarning yozma shaklda bajargan imtihon ishlarini tekshirish va baholash kirish yozma imtihonlarini tekshirish va baholash uchun belgilangan tartibda amalga oshiriladi.

6. Imtihonlar test sinovlari majmualaridagi fanning egallagan o'rniga qarab (tegishli ravishda 75,6 ball yoki 39,6 ball) belgilangan eng ko'p ballning 0 dan 100 foizgacha bo'lgan oralig'ida, yagona ko'p balli tizim bo'yicha baholanadi.

Imtihonlarni baholash mezonlari har bir fanga ajratilgan umumiy ballar doirasida, abituriyentlarga qo'yilgan talablarning xususiyatlari hisobga olingan holda, oliy ta'lim muassasasining fan imtihon komissiyasi tomonidan belgilanadi.

O'zbekiston Respublikasi Oliy va o'rta maxsus ta'lim vazirligi kasbiy (ijodiy) imtihon o'tkaziladigan fanlar bo'yicha yagona dastur va baholash mezonlarini tasdiqlaydi va tegishligiga qarab oliy ta'lim muassasalariga yetkazadi.

Agar imtihon ta'lim yo'nalishi doirasidagi qator mustaqil fanlar bo'yicha o'tkaziladigan bo'lsa, unda uni baholash uchun belgilangan ballarning umumiy miqdori, har bir fanning xususiyatlari hisobga olingan holda, differensial tartibda, uning tarkibidagi fanlarga bo'linadi.

Oliy ta'lim muassasasi qabul komissiyasi imtihonlar boshlanishidan bir oy oldin abituriyentlar e'tiboriga O'zbekiston Respublikasi Oliy va o'rta maxsus ta'lim vazirligi tomonidan tasdiqlangan imtihon olinadigan fanlar dasturini, ularni baholash mezonlarini, maslahatlar va imtihonlar jadvalini ma'lum qiladi. "Oliy hamshiralik ishi" yo'nalishi bo'yicha ushbu tadbirlar O'zbekiston Respublikasi Sog'liqni saqlash vazirligi tomonidan amalga oshiriladi.

7. Imtihonlar yakunlari ballar miqdori sifatida, tanlov tartibida imtihon varaqasiga va imtihon ro'yxatiga kiritiladi. Bu hujjatlarning har biri fan bo'yicha imtihon komissiyasi raisi va oliy ta'lim muassasasi qabul komissiyasining mas'ul kotibi tomonidan imzolanadi. Imtihon qaydnomalari oliy ta'lim muassasasi qabul komissiyasi tomonidan o'z vaqtida Davlat test markaziga taqdim etiladi.

8. Jadval bo'yicha kasbiy (ijodiy) imtihonlarga kelmagan abituriyentlar test sinovlariga qo'yilmaydi.

9. Oliy ta'lim muassasasida kasbiy (ijodiy) imtihonlar o'tkazilishi davrida belgilangan tartibda norozilik (apellyatsiya) arizalarini ko'rib chiqish uchun appelyatsiya komissiyasi ishi tashkil etiladi.

O'qitish tojik, qozoq, turkman va qirg'iz tillarida olib boriladigan ayrim ta'lim yo'nalishlari bo'yicha kirish imtihonlarini qabul qilish tartibi:

1. Ayrim ta'lim yo'nalishlari bo'yicha o'qitish tojik, qozoq, turkman va qirg'iz tillarida olib boriladigan oliy ta'lim muassasalarida, Davlat komissiyasi bilan kelishgan holda, qabul ko'p balli tizim bo'yicha kasbiy imtihonlar va test sinovlari asosida amalga oshiriladi.

Bu ta'lim yo'nalishiga arizalar faqat umumiy o'rta ta'lim muassasasini yoki o'rta maxsus, kasb-hunar ta'lim muassasasini ko'rsatilgan tillarda bitirgan abituriyentlardan qabul qilinadi.

2. Ko'p balli tizim bo'yicha kasbiy imtihonlar va test sinovlari asosida qabulni amalga oshiruvchi oliy ta'lim muassasalari ko'rsatilgan holda o'qitish tojik, qozoq, turkman va qirg'iz tillarida olib boriladigan ta'lim yo'nalishlarining ro'yxatini, kasbiy imtihonlar va test sinovlari fanlarini Davlat komissiyasi belgilaydi.

3. Savollar mazmuni va imtihonlar topshiriqlari umumiy o'rta ta'lim, o'rta maxsus, kasb-hunar ta'limi umumta'lim fanlari dasturlariga qat'iy muvofiq bo'lishi lozim.

4. Abituriyentlardan kasbiy (ijodiy) imtihonlarni qabul qilish uchun oliy ta'lim muassasasida belgilangan tartibda fanlar bo'yicha imtihon komissiyalari tashkil etiladi.

Oliy ta'lim muassasasi idoraviy bo'ysunishiga qarab vazirlik (idora) bilan kelishilgan holda fanlar bo'yicha imtihon komissiyalarining raisligiga nomzodlarni o'z vaqtida tasdiqlash uchun O'zbekiston Respublikasi Oliy va o'rta maxsus ta'lim vazirligiga taqdim etadi.

Imtihonlar tasdiqlangan jadvalga qat'iy rioya etilgan holda o'tkaziladi.

Imtihonlarga ajratiladigan vaqt oliy ta'lim muassasasi qabul komissiyasining qarori bilan belgilanadi.

5. Imtihonlar test sinovlari majmualaridagi fanning egallagan o'rniga qarab (tegishli ravishda 111,6 ball, 75,6 ball yoki 39,6 ball) belgilangan eng ko'p ballning 0 dan 100 foizgacha bo'lgan oralig'ida, yagona ko'p balli tizim bo'yicha baholanadi.

Imtihonlarni baholash mezonlari, har bir fanga ajratilgan umumiy ballar doirasida, oliy ta'lim muassasasining imtihon komissiyasi tomonidan belgilanadi.

Oliy ta'lim muassasasi qabul komissiyasi imtihonlar boshlanishidan bir oy oldin, abituriyentlar e'tiboriga O'zbekiston Respublikasi Oliy va o'rta maxsus ta'lim vazirligi tomonidan tasdiqlangan imtihon olinadigan fanlar dasturi, ularni baholash mezonlari, maslahatlar va imtihonlar jadvalini ma'lum qiladi.

O'zbekiston Respublikasi Oliy va o'rta maxsus ta'lim vazirligi kasbiy (ijodiy) imtihon o'tkaziladigan fanlar bo'yicha yagona dastur va baholash mezonlarini tasdiqlaydi va tegishligiga qarab oliy ta'lim muassasalariga yetkazadi.

6. Imtihonlar yakunlari ballar miqdori sifatida, tanlov tartibida imtihon varaqasiga va imtihon ro'yxatiga kiritiladi. Bu hujjatlarning har biri fan bo'yicha imtihon komissiyasi raisi va oliy ta'lim muassasasi qabul komissiyasining mas'ul kotibi tomonidan imzolanadi.

Imtihonlar natijalariga ko'ra, oliy ta'lim muassasasi qabul komissiyasi belgilangan ta'lim yo'nalishlari bo'yicha tasdiqlangan o'rinlar kvotasiga tanlov o'tkazadi.

7. Jadval bo'yicha imtihonga kelmagan abituriyentlar navbatdagi imtihonni topshirishga kiritilmaydi.

8. Oliy ta'lim muassasasida kasbiy imtihonlar o'tkazilishi davrida belgilangan tartibda norozilik (appelyatsiya) komissiyasining ishi tashkil etiladi.

9. Kasbiy (ijodiy) imtihonlar adolatli va xolisona o'tkazilishini ta'minlash bo'yicha shaxsiy mas'uliyat oliy ta'lim muassasasi rektori va qabul komissiyasi mas'ul kotibi zimmasiga yuklanadi.