O‘zbekistonda haftaning har payshanba kuni ‘‘Yoshlar kuni’’ etib belgilandi

O‘zbekistonda har payshanba — “Yoshlar kuni” etib belgilandi

Shavkat Mirziyoyev yoshlar bilan uchrashuv chog‘ida ularning tashabbuslarini qo‘llab-quvvatlash bo‘yicha qo‘shimcha imkoniyatlar yaratilishini ma’lum qildi. Unga ko‘ra, endilikda haftaning har payshanba kuni mamlakat bo‘ylab “Yoshlar kuni” sifatida o‘tkaziladi.

Mazkur tashabbus yoshlarning muammolarini joyida hal qilish, ularning bandligi, ta’limi va tadbirkorligini qo‘llab-quvvatlashga qaratilgan.

“Yoshlar kuni” doirasida qanday ishlar amalga oshiriladi?

Vazirlik va hokimliklarda ochiq muloqot

Har payshanba kuni vazirlik, idora va hokimliklarda sohaga mas’ul rahbarlar mahalla, maktab va texnikumlarga borib, yoshlar bilan uchrashadi. Ular yoshlarning muammolarini eshitib, amaliy yechimlar ishlab chiqadi.

Yoshlarbop loyihalar va bandlikni ta’minlash

Hududlarda hokimlar tomonidan yoshlar uchun savdo-servis loyihalari yo‘lga qo‘yiladi. Shuningdek:

• ta’lim olish imkoniyatlarini kengaytirish,

• sport bilan shug‘ullanish uchun sharoit yaratish,

• kasb va xorijiy til o‘rganishga ko‘maklashish,

• ishga joylashish va tadbirkorlikni qo‘llab-quvvatlash,

• startap loyihalar uchun grant va mablag‘ ajratish rejalashtirilgan.

Startapchilar bilan alohida uchrashuvlar o‘tkazilib, innovatsion g‘oyalar rag‘batlantiriladi.

Eng faol yoshlar uchun tanlov va yarmarkalar

“Yoshlar kuni” doirasida quyidagi yo‘nalishlarda tanlov va yarmarkalar tashkil etiladi:

• eng yaxshi tomorqachi,

• ilg‘or fermer,

• yosh sanoatchi,

• startapchi,

• ijodkor va ma’naviyat targ‘ibotchilari.

Bu orqali yoshlarning ijtimoiy faolligi oshiriladi va ularning mehnati e’tirof etiladi.

Ta’lim va innovatsiyaga alohida e’tibor

Davlat rahbari ta’lim tizimiga yangi metodika va innovatsiyalarni joriy etish zarurligini ta’kidladi. Rahbarlar izlanib, ta’lim sifatini oshirishga hissa qo‘shsa, ularning faoliyatida ham ijobiy o‘zgarishlar bo‘lishi qayd etildi.

Yoshlar yutuqlari: raqamlar nimani ko‘rsatmoqda?

So‘nggi yillarda o‘zbekistonlik yoshlar xalqaro miqyosda sezilarli natijalarga erishdi:

Fan olimpiadalari

• 66 ta oltin medal

• 147 ta kumush medal

• 221 ta bronza medal

Nufuzli xorijiy oliygohlar

Yurtimiz yoshlari dunyoning eng nufuzli universitetlarida tahsil olmoqda. Jumladan:

• Harvard University

• Yale University

• Princeton University

• Columbia University

• Cornell University

Bugungi kunda ushbu kabi nufuzli oliygohlarda tahsil olayotgan yoshlar soni 500 nafardan oshgan. TOP-100 talikdagi universitetlarda o‘qiyotgan o‘g‘il-qizlar esa 3,5 ming nafardan ziyod.

Sport sohasida

O‘zbekistonlik yosh sportchilar xalqaro musobaqalarda:

• 720 ta oltin,

• 671 ta kumush,

• 854 ta bronza medalni qo‘lga kiritgan.

Bu natijalar yoshlar salohiyati yuksalib borayotganini ko‘rsatadi.