Yangi tarixiy yondashuv: Turkiya “Turkiston” atamasini joriy qilmoqda

Turkiya Milliy ta’lim vazirligi tarix darsliklarida sezilarli o‘zgarishlar kiritilishini e’lon qilgan. Yangi o‘quv dasturida “Markaziy Osiyo” atamasi o‘rniga “Turkiston” atamasi qo‘llaniladi. Mutaxassislar bu yangilik yosh avlodda turk milliy ongi va vatanparvarlik tuyg‘usini shakllantirishga qaratilganini ta’kidlagan.

Turkiya Prezidenti Rajab Toyyib Erdo‘g‘on turk davrini davom ettirish va Turkiyaning dunyo hamjamiyatidagi rolini mustahkamlash niyatida ekanini ma’lum qildi. U turk dunyosining birligini mustahkamlash zarurligini “Bizning birlik – bizning kuchimiz” shiori ostida izohlagan.

“Rahbarlar sifatida biz turk dunyosi bayrog‘ini ko‘tarib yurgan qalblarga yo‘l-yo‘riq ko‘rsatishimiz lozim. Millatimiz dunyosining kuchli birligi va birdamligini ta’minlash zarur. Turkiya Respublikasi sifatida biz turk dunyosining tinchlik, farovonlik va xavfsizligini ta’minlash yo‘lida ish olib borishda davom etamiz. Biz birgalikda ishlaymiz va keyingi davrni turk davriga aylantirish uchun, Turk asri konsepsiyasini Turk davlatlari tashkilotiga tarqatish yo‘lida harakat qilamiz,” — dedi u.

Milliy Ta’lim vazirligi 2024-2025 o‘quv yilidan boshlab maktabgacha, boshlang‘ich va o‘rta maktablar uchun yangi o‘quv modelini taqdim etgan. E’tibor eskirgan va ilmiy noto‘g‘ri atamalardan voz kechishga qaratilgan. Shu doirada endilikda “Markaziy Osiyo” o‘rniga “Turkiston” va “Ko‘chirish va joylashtirish qonuni” eski atamalarni almashtiradi.

Tarixchilar professor Ahmet Tasagil va dotsent Ramin Sodiq vazirlik qarorini qo‘llab-quvvatlagan. Ular bu o‘zgarish yosh avlodning milliy o‘zlikni anglash va vatanparvarlik tuyg‘usini shakllantirishda muhim qadam ekanligini ta’kidlagan.