Avstraliya talaba vizasi: yangi talablar va shartlar

Avstraliya xalqaro talabalarni qabul qilish bo‘yicha yetakchi davlatlardan biri bo‘lib, so‘nggi yillarda O‘zbekistonlik yoshlarning ham ushbu mamlakatda ta’lim olishga bo‘lgan qiziqishi ortib bormoqda. Biroq 2024-yildan boshlab Avstraliya talaba vizasi bo‘yicha muhim o‘zgarishlar joriy qilindi.

Asosiy o‘zgarishlar

1. Ingliz tilini bilish bo‘yicha talablar oshirildi

Endilikda talaba vizasini olish uchun IELTS natijalari bo‘yicha talablar quyidagicha o‘zgardi:

• Bakalavr dasturlari uchun minimal IELTS darajasi 5.5 emas, 6.0 ga oshirildi.
• Magistratura dasturlari uchun esa avval 6.0 bo‘lgan talab endilikda kamida 6.5 daraja bo‘lishi lozim.

2. Yosh chegarasi qisqartirildi

• Magistratura dasturlariga hujjat topshirayotgan talabalar uchun maksimal yosh chegarasi 50 yoshdan 35 yoshga tushirildi.

3. Viza muddati bo‘yicha o‘zgarishlar

• Magistratura kurs ishi uchun beriladigan viza muddati 2 yil etib belgilandi.
• Tadqiqot olib boruvchi magistr va PhD talabalari uchun viza muddati 3 yil etib belgilandi.

4. «Genuine Student Test» joriy qilinadi

Avstraliyaga kelayotgan talabalar faqatgina o‘qish maqsadida ekanligini isbotlashlari kerak. Yangi «Genuine Student Test» orqali o‘qishdan ko‘ra ishlash istagi yuqori bo‘lgan nomzodlar aniqlanadi va ularga viza berilish ehtimoli kamayadi.

Ishlash istagida bo‘lganlarga yangi imkoniyatlar

Avstraliyada ishlash uchun kelmoqchi bo‘lganlar uchun yangi imkoniyatlar yaratilmoqda. Yangi vizalar orqali mehnat bozoriga yo‘naltirilgan dasturlar kengaymoqda, bu esa ishga joylashish istagida bo‘lganlar uchun qulay imkoniyat yaratadi.

Xulosa

Avstraliyada ta’lim olish istagida bo‘lgan abituriyentlar yangi viza talablarini hisobga olishlari zarur. Ingliz tili bo‘yicha talablar kuchaytirildi, yosh chegarasi pasaytirildi va viza muddati aniq belgilandi. Shu sababli, Avstraliya universitetlariga hujjat topshirishni rejalashtirayotganlar bu o‘zgarishlarni inobatga olishlari lozim.