Bugundan kasbiy (ijodiy) imtihonlar boshlanadi: nimalarni bilish kerak?

Bugundan boshlab oliy va professional ta’lim muassasalariga kirish uchun kasbiy (ijodiy) imtihonlar boshlanadi. Joriy yil iyul oyida bo‘lib o‘tgan kirish imtihonlaridan so‘ng, talabalar o‘qishini xorijiy davlatlardagi, shuningdek, O‘zbekistondagi xorijiy va nodavlat oliy ta’lim tashkilotlaridan davlat oliy ta’lim muassasalarining alohida iqtidor talab etadigan yo‘nalishlariga ko‘chirish bo‘yicha kasbiy (ijodiy) imtihonlar 16–17-avgust kunlari o‘tkazilishi belgilangan.

Prezident farmoniga muvofiq, joriy yil oliy va professional ta’lim muassasalariga kirish imtihonlari iyul-avgust oylarida o‘tkazilishi belgilangan. Bu imtihonlar 53 ta oliy ta’lim muassasasida sport, san’at, jurnalistika kabi alohida iqtidor talab etadigan yo‘nalishlarda o‘tkaziladi.

Ijodiy imtihonlarga kirish uchun abituriyentlardan hujjat topshirishda o‘z telefon raqamlari va manzil haqidagi ma’lumotlarni aniq ko‘rsatishlari talab etiladi, chunki imtihon sanalari haqida ma’lumot ularga bog‘langan holda yetkaziladi. Shuningdek, abituriyentlar oliy o‘quv yurtlarining rasmiy veb-saytlarini kuzatib borishlari ham muhim.

Ruxsatnomalar qayerdan olinadi?

Ruxsatnoma abituriyentning my.uzbmb.uz saytidagi shaxsiy kabinetida shakllantiriladi. Unda imtihon o‘tkaziladigan manzil, kuni va vaqti to‘g‘risidagi ma’lumotlar ko‘rsatilgan bo‘ladi. Hozirda kasbiy/ijodiy imtihonlarga kiradigan abituriyentlar shaxsiy kabinetlaridan ruxsatnomalarni yuklab olishlari mumkin.

Test sinovlariga kirish uchun ruxsatnomalar ham my.uzbmb.uz saytida shakllantirilmoqda. Jarayon yakunlangach, abituriyentlar o‘z ruxsatnomalarini yuklab olishlari mumkin.

Imtihonga kechikish mumkin emas. Imtihonlarning boshlanish aniq vaqti abituriyent ruxsatnomasida ko‘rsatilgan bo‘ladi. Shuning uchun abituriyentlardan ruxsatnomada belgilangan muddat va manzilga imtihon boshlanishidan bir soat oldin yetib borishlari so‘raladi.

Boshqa viloyatda test sinovi topshirish mumkinmi?

Yo‘q, abituriyentlar onlayn ro‘yxatdan o‘tishda belgilagan hududda imtihon topshirishlari shart. Chunki test materiallari faqatgina u belgilagan hudud uchun tayyorlanadi va uni almashtirish imkoni yo‘q.

Bundan tashqari, mazkur farmon bilan 2024–2025 o‘quv yilidan davlat buyurtmasi parametrlarini davlat OTMlari kesimida taqsimlash amaliyoti bekor qilinadi. Parametrlar bakalavriat ta’lim yo‘nalishlari va magistratura mutaxassisliklari bo‘yicha kunduzgi ta’lim shaklida tasdiqlanadi.