Namanganda uchta oliygoh birlashtirilib, Namangan davlat texnika universiteti tashkil etiladi

Namangan muhandislik-texnologiya instituti, Namangan muhandislik-qurilish instituti va Namangan to‘qimachilik sanoati instituti birlashtirilib, Namangan davlat texnika universiteti tashkil etilmoqda. Ushbu qaror muhandislik va texnologiyalar sohasida yuqori malakali kadrlar tayyorlashni yangi bosqichga olib chiqish maqsadida qabul qilindi.

Yangi universitetning asosiy vazifalari

• Muhandislik, qurilish, to‘qimachilik, axborot texnologiyalari, dasturlash, ishlab chiqarish va xizmat ko‘rsatish sohalarida yuqori malakali mutaxassislar tayyorlash.
• Hudud ehtiyojlariga mos kadrlarni tayyorlash va ilmiy-pedagogik faoliyatni rivojlantirish.
• Ilg‘or muhandislik maktabini yuridik shaxs maqomisiz tashkil qilish va uning faoliyatini yo‘lga qo‘yish.

Talabalar uchun yangi imkoniyatlar

• 2025/2026-o‘quv yilidan boshlab:
  • Bitiruv malakaviy ishlari va magistrlik dissertatsiyalari ish beruvchi korxonalar muammolari asosida tayyorlanadi.
  • Bitiruv ishlari va dissertatsiyalar korxonalarda himoya qilinadi.
• 2026/2027-o‘quv yiliga qadar:
  • Kamida ikkita bakalavriat ta’lim yo‘nalishi va uchta magistratura mutaxassisligi xalqaro akkreditatsiyadan o‘tkaziladi.
• 2025-yildan:
  • Yirik sanoat korxonalari Universitetga sanoat hamkori sifatida biriktiriladi.

Talabalar va bitiruvchilar haqida

NamMT, NamMQI va NamTSIda tahsil olayotgan barcha talabalar o‘z o‘qishini Universitetda davom ettiradi. 2024/2025-o‘quv yilidan boshlab bitiruvchilarga Namangan davlat texnika universiteti diplomi beriladi.