Vazirlik o‘yindan chiqdi: Ta’tilni uzaytirish vakolati hokimlarga berildi

10.01.2023 21:10
Vazirlik o‘yindan chiqdi: Ta’tilni uzaytirish vakolati hokimlarga berildi
Sifatli ta'lim natijaga asoslanadi
– Registon o‘quv markazi

14 ta hudud rahbarlari bog‘chalar, maktablar, professional ta’lim muassasalari va oliygohlardagi ta’tilni uzaytirish yo uzaytirmaslikni ob-havo sharoitidan kelib chiqqan holda mustaqil hal qiladi.

Maktabgacha, umumta’lim, o‘rta maxsus, professional hamda oliy ta’lim tashkilotlarida qishki ta’til davrini uzaytirish yoki uzaytirmaslik vakolati hokimlarga berilgan.

Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklariga bu masalada ob-havo sharoitlaridan kelib chiqqan holda, mustaqil ravishda qaror qabul qila oladi.

Maktabgacha va maktab ta’limi vazirligi matbuot xizmatining ma’lum qilishicha, hokimlarning bunday vakolatga egaligi Vazirlar Mahkamasining tegishli bayonida ko‘zda tutilgan.

Vazirlikning qo‘shimcha qilishicha, “Ta’lim to‘g‘risida”gi qonunning 27-moddasida mahalliy davlat hokimiyati organlariga ta’lim sohasida tegishli vakolatlar berilgan.

Biroq, Iste’molchilar huquqlarini himoya qilish jamiyatlari federatsiyasining Kun.uz’ga ma’lum qilishicha, bu asos bo‘la olmaydi. 27-moddada mahalliy davlat hokimiyati organlariga ta’lim tashkilotlari uchun o‘quv ta’tillarini belgilash yoki ularni bekor qilib, o‘quv jarayonlarini boshlash vakolati berilmagan.

Eslatib o‘tamiz, 5 yanvar kuni O‘zbekistonda kutilayotgan anomal sovuq ob-havo munosabati bilan barcha ta’lim muassasalarida qishki ta’til uzaytirilib, darslar 18 yanvardan boshlanishi rasman e’lon qilingan edi. Lekin, 10 yanvarga kelib, qator hududlardagi ta’lim muassalarida darslar 11 yanvardan boshlanishi ma’lum qilindi.