Toshkentdagi 31 ta OTMda darslar soat 9:30 dan boshlanadi

03.01.2023 00:40
Toshkentdagi 31 ta OTMda darslar soat 9:30 dan boshlanadi
Rus tilini videodarslar orqali Professional ustozlardan BEPUL o'rganing.
– Registon o‘quv markazi

Toshkent shahrida qator oliy ta’lim muassasalarida darslarning boshlanish vaqti o‘zgaradi. Bu qaror metrodagi tirbandlikni kamaytirish maqsadida qabul qilingan.

9 yanvardan Toshkentda metro bekatlarga yaqin joylashgan 31 ta OTMda dars jarayonining boshlanish vaqti o‘zgartiriladi. Bu haqda Oliy va o‘rta maxsus ta’lim vazirligi matbuot xizmati xabar qildi.

Ma’lum qilinishicha, mazkur qaror poytaxt metropolitenida yo‘lovchi oqimini to‘g‘ri taqsimlash, talabalarning o‘z vaqtida dars mashg‘ulotlariga yetib borishlari uchun qulaylik yaratish maqsadida qabul qilindi.

Transport vazirligi, Oliy va o‘rta maxsus ta’lim vazirligi hamda Toshkent shahar hokimligi tomonidan qabul qilingan qarorda keltirilishicha, tegishli ta’lim muassasalarida ish grafigi maqbullashtirilgandan so‘ng tig‘iz vaqtlarda metropolitenda yo‘lovchi oqimini to‘g‘ri taqsimlash bo‘yicha qo‘shimcha choralar ko‘riladi.

Eslatib o‘tamiz, prezident qarori bilan 2023 yil 1 yanvardan Oliy va o‘rta maxsus ta’lim vazirligi negizida Oliy ta’lim, fan va innovatsiyalar vazirligi tashkil etildi. 2022 yil oxirida hukumat tarkibi yangilanib, sobiq innovatsiya vaziri Ibrohim Abdurahmonov bu vazirlikka vazir etib tayinlandi. Oliy ta’lim vazirligining sobiq rahbari Abduqodir Toshqulov prezident maslahatchisiga o‘rinbosar bo‘lgandi.