Grantlarni qayta taqsimlash tartibi bo‘yicha rasmiy izoh berildi

Grantlarni qayta taqsimlash tartibi haqida ayrim tushuntirishlar

Oliy ta’lim vazirligi tomonidan tasdiqlangan grantlarni qayta taqsimlash tartibi yuzasidan turli savollar kelib tushmoqda. Quyida ushbu tartib bo‘yicha muhim savollarga aniq javoblar taqdim etiladi.

Bu tartib kimlarga taalluqli?

✅ 2024/2025-o‘quv yilida talaba bo‘lganlar uchun amal qiladi, ya’ni hozirgi 1-kurs bakalavr va magistrlar yozda qayta tanlov asosida grantga ega bo‘lishadi.

❌ Hozirgi 2-kurs va undan yuqori kurs talabalariga tatbiq etilmaydi. Ular oldingi shartlar asosida o‘qishni davom ettiradilar.

Magistratura talabalari uchun ham amal qiladimi?

✅ Ha, magistraturada 1-kursda tahsil olayotganlar uchun ham grantlar har yili qayta taqsimlanadi.

❗ Quyidagi holatlar bundan mustasno:

• Magistraturada tahsil olayotgan qizlar – kontrakti davlat tomonidan qoplanadi.

• To‘liq davlat granti asosidagi mutaxassisliklar – tartib qo‘llanilmaydi.

• 1 yillik magistratura dasturlari – ushbu tartib tatbiq etilmaydi.

Imtiyozli grant egalari haqida-chi?

❌ Imtiyoz asosida grantga kirgan talabalar (xalqaro olimpiada g‘oliblari, nogironligi bor abituriyentlar, organ xodimlari farzandlari, tavsiyanoma olgan xotin-qizlar va h.k.) uchun bu tartib amal qilmaydi.

✅ Ularga 4 yil davomida grant kafolatlanadi, o‘zlashtirish ko‘rsatkichidan qat’i nazar.

Maqsadli qabul asosida o‘qiyotganlar-chi?

❌ Maqsadli qabul orqali grantga ega bo‘lgan talabalar ham to‘rt yil davomida grant asosida o‘qishni davom ettiradi, ularga qayta taqsimlash tatbiq etilmaydi.

Bir marta grantdan ayrilgan talaba yana da’vogar bo‘la oladimi?

✅ Ha, GPA 3,5 va undan yuqori bo‘lsa, keyingi yili yana grantga da’vogarlik qilish mumkin.

📌 Har yili iyul-avgust oylarida yangi tanlov o‘tkaziladi, avvalgi natijalar hisobga olinmaydi.