Registon stipendiyasi - 2023 tanlovining natijalari e’lon qilindi

Xabaringiz bor, Respublika miqyosida iqtidorli yoshlarni qoʻllab-quvvatlash va moliyaviy ragʻbatlantirish maqsadida Registon ta’lim loyihasi, Oliy ta’lim, fan va innovatsiyalar vazirligi hamda OLIYGOH.UZ ta’lim platformasi hamkorligida talabalar uchun “REGISTON STIPENDIYASI — 2023” tanlovi e’lon qilingan edi. Tanlovda ishtirok etgan nomzodlar 3 oy davomida 3 bosqichdan iborat bo‘lgan imtihon tizimida o‘z bilimlarini sinovdan o‘tkazishdi.

— Stipendiya tanlovi e’lon qilingandan so‘ng ushbu loyiha yuz minglab yoshlar orasiga kirib bordi va 82 mingdan ziyod talabalar ushbu stipendiya uchun ro‘yxatdan o‘tdilar.

— Tanlovning 1-bosqichida Respublikamizning turli hududlaridan 12 mingdan ziyod iqtidorli talabalar tanlov imtihonida ishtirok etdi hamda eng yaxshi natija ko‘rsatgan 1071 nafar nomzodlar keyingi bosqichga yo‘llanmani qo‘lga kiritishdi. (Natijalarni ko‘rish) Birinchi bosqichda ishtirok etgan barcha nomzodlar "Shaxsiy kabinet" orqali tanlovning maxsus sertifikatlarini yuklab olishlari mumkin (Sertifikatlarni yuklab olish).

— Tanlovning ikkinchi bosqichiga o‘tgan nomzodlar orasida 2-bosqich imtihonlari bo‘lib o‘tdi hamda ushbu bosqichda eng yaxshi natija ko‘rsatgan 209 nafar ishtirokchilar final yo‘llanmasini qo‘lgan kiritishdi (Natijalarni ko‘rish)

— Tanlov yo‘riqnomasi va nizomiga ko‘ra, 3-bosqich (final) bosqichi eng yaxshi natija ko‘rsatgan ishtirokchilar o‘rtasida bo‘lib o‘tdi. Uchinchi bosqich Hujjatlar topshirish bosqichi bo‘lib, stipendiya tanlovida ishtirok etayotgan nomzodlar tanlov nizomida ko‘rsatilgan hujjatlarni belgilangan tartibda platformaning maxsus imtihonlar oynasi orqali taqdim etdilar. Tanlovning maxsus komissiyasi ushbu hujjatlarni 4 ish haftasi davomida tekshiruvdan o‘tkazishdi.

Komissiya tarkibi:

Rais:

• Tulovov Avazbek — Registon ta’lim loyihasi asoschisi.

Komissiya a’zolari:

• 10 kishidan tarkib topgan xalqaro darajadagi Registon o‘quv markazining professional ustozlari;
• Isaxonov Ja’farxon — OLIYGOH.UZ platformasi asoschilaridan biri, Navoiy Davlat stipendiyasi sovrindori, Respublika ilmiy tadqiqotlar stipendianti, ko‘plab davlat va xalqaro grantlar finalisti;
• Tolibjonov Botirjon — Registon ta’lim loyihasi "HR bo‘limi" direktori, ijtimoiy loyihalar koordinatori;
• Hamidjonov Shavkat — OLIYGOH.UZ platformasi asoschilaridan biri, xalqaro CDAC, ACTS grantlari sovrindori, ko‘plab xalqaro darajada startuplar asoschisi.

Tanlov komissiyasi tomonidan xalqaro toifadagi stipendiya loyihalarini o‘rgangan holda nomzodlarni natijalari quyidagi talablar asosida 100 ballik baholash tizimida baholandi:

• O‘qish joyidan talabaga berilgan Registon stipendiyasi uchun dekanat yoki kafedraning tavsiyanomasi. Tavsiyanomada universitetning rasmiy vakili talaba haqida bergan ma’lumotlari;
• Talabaning 2022-2023 o‘quv yillarida turli tanlov va loyihalarda erishgan yutuqlari, sertifikatlari diplomlari mutaxassilar tomonidan sinchkovlik bilan tekshirildi;
• Talabaning 2022-2023 o‘quv yillarida ijtimoiy faolligi shuningdek nashr ettirilgan ilmiy ishlar, patent, ixtirolari o‘rganib chiqildi
• Talaba nafaqat ilmiy ish yoki yutuqlar, balkim xalqaro darajada olgan imtihon sertifikatlari ham o‘rganildi;
• Shuningdek talabalar jo‘natgan hujjatlar aslida to‘g‘riligi, shaxsini tasdiqlovchi hujjat, o‘qish joyidan ma’lumotnoma (my.gov.uz orqali tasdiqlangan yoki dekanatdan tasdiqlangan ma’lumotnoma), CV (ma’lumotnoma)lari ham o‘rganib chiqildi va komissiya a’zolari natijalarni umumlashtirilgan holda quyidagi nomzodlarni “Registon stipendiyasi - 2023" tanlovining sovrindorlari deb e’lon qiladi:

(Final natijalarini ko‘rish)

Stipendiya g‘oliblarini rag‘batlantirish

Stipendiya tanlovining mutlaq g‘oliblari “REGISTON” o‘quv markazining maxsus tadbirlar bo‘lib o‘tadigan zalida “Registon stipendiyasi sohibi” maxsus guvohnomasi, esdalik sovg‘alar, pul yutuqlari bilan tantanali ravishda taqdirlanadi. Taqdirlash marosimi bo‘yicha tanlov tashkilotchilari tomonidan g‘oliblarga maxsus sms-xabarnoma yuboriladi.

Registon ta’lim loyihasi va OLIYGOH.UZ jamoasi tanlovning barcha g‘oliblarini tabriklaydi!

Eslatma: Tanlov natijalaridan norozi bo‘lgan ishtirokchilar 6-iyul soat 17:00 ga qadar apellyatsiya arizasi yozishlari mumkin. Arizani OLIYGOH.UZ platformasida ochilgan "Shaxsiy kabinet"ning Onlayn murojaat bo‘limi orqali yuborishlari mumkin. Uch ish kunida arizaga rasmiy javob qaytariladi. Apellyatsiya quyidagi namuda bo‘lishi shart: Apellyatsiya.pdf

✅ Ma’lumot uchun:

1. Tanlovga Respublikaning turli hududlaridan 82 mingdan ziyod iqtidorli yoshlar ro‘yxatdan o‘tdi;
2. Tanlovning 1-bosqichida 12 mingdan ziyod nomzod imtihonda ishtirok etdi;
3. Eng yaxshi natija ko‘rsatgan 1071 nafar nomzod 2-bosqichga yo‘llanma oldi;
4. Eng yaxshi natija ko‘rsatgan 209 nafar nomzod final bosqichiga yo‘llanmani qo‘lga kiritishdi.