Tuman mudiri o‘quvchilarni xususiy maktablarga yuborishni talab qilmoqdami?

Tuman mudiri direktorlarga o‘quvchilarini xususiy maktablarga yuborish topshirig‘ini bergani aytilmoqda

Davlat umumiy o‘rta ta’lim maktablari direktorlariga noma’lum tuman bo‘lim boshlig‘i tomonidan, o‘z o‘quvchilarini xususiy maktablarga yuborishi so‘ralgan.

Bloger Isroil Tillaboyev o‘z telegram kanalida, bu holatga quyidagicha munosabat bildirdi:

"Bizdagi ta’limga bo‘lgan umid shu darajadaki, hattoki tuman bo‘limi boshlig‘i ham buni yaxshi bo‘lib ketishiga ishonmay, ota-onalarga xususiy maktablarga bolasini jo‘natishini so‘rab, bolalarni davlat nomidan o‘qitishga mas’ul etib tayinlangan direktorlariga topshiriq beradi. Rasmiy xat bu bajarish shart bo‘lgan ijro hujjati hisoblanib, uning ijrosi ta’minlanishi nazorat qilinadi, demak maktab direktorlari nechta o‘quvchini xususiyga yuborgani haqida hisobot beradi, ehtimol o‘quvchilarini xususiyga haydamaganlar gap eshitadi."

Tillaboyev yana qo‘shimcha qildi: "Xususiy maktablar ham kerak, sifatda raqobatni sal hosil qiladi, lekin ja unchalik emas-da o‘rtoq mudirlar. Hozirdanoq sizlar oq bayroq ko‘tarvorsalaring, qolganlar nima qilsin? Sal hazilakam bo‘lsa ham kurashinglar, xususiylardan yaxshi o‘qitishga harakat qilishga. Jang qilmasdan yengilsalaring, xususiyga puli yetmaydigan xalqqa qiyin bo‘ladi-da axir. O‘zi tabaqalanish kuchayaveradi bundan buyog‘iga, buni endi mudirlar o‘zi bosh bo‘lib yordamlashishi sharmanda-da."