Oliy ta’lim vazirligiga yangi rahbar tayinlandi

Vazirlik rahbarligi 2023 yil oktyabridan buyon bo‘sh qolayotgandi.

O‘zbekiston prezidentining farmoni bilan Qo‘ng‘irotboy Avezimbetovich Sharipov O‘zbekiston oliy ta’lim, fan va innovatsiyalar vaziri lavozimiga tasdiqlandi.

Prezident matbuot xizmati xabariga ko‘ra, Q. Sharipov nomzodi Oliy Majlis Qonunchilik palatasi deputatlari tomonidan ma’qullangan.

Kongratboy Sharipov 2009-2010 va 2017-2019 yillarda Toshkent shahridagi Turin politexnika universiteti rektori sifatida, 2010-2017 yillarda shu universitetda moliyaviy va iqtisodiy ishlar bo‘yicha birinchi prorektor bo‘lgan, 2019 yilning mayidan Oliy va o‘rta maxsus ta’lim vazirining birinchi o‘rinbosari sifatida ishlagan.

2019 yil noyabrida esa Toshkent davlat iqtisodiyot universitetiga rektor etib tayinlangandi.

• Eslatib o‘tamiz, 2022 yil dekabrida Oliy va o‘rta maxsus ta’lim vazirligi va Innovatsion rivojlantirish vazirligi qo‘shib yuborilgan va 2023 yil yanvarida yangi vazirlikka Ibrohim Abdurahmonov rahbar etib tayinlangandi.
• Ammo Abdurahmonov 2023 yil oktyabrida qishloq xo‘jaligi vazirligi rahbarligiga o‘tkazildi va shundan keyin oliy ta’lim vazirligi rahbarligi bo‘sh qolayotgandi.