O‘zbekiston OTMlarida noyob imij va brend konsepsiyasi ishlab chiqiladi

O‘zbekiston Respublikasi Vazirlar Mahkamasining yangi qaror loyihasiga ko‘ra, mamlakatdagi har bir oliy ta’lim muassasasining (OTM) noyob imij va brend konsepsiyasi ishlab chiqilishi kutilmoqda. Ushbu loyiha regulation.adliya.uz portalida jamoatchilik muhokamasi uchun e’lon qilindi.

OTMlar brend va imij konsepsiyasi qanday bo‘ladi?

• 1-avgustga qadar har bir OTM o‘zining tarixiy rivojlanish xususiyatlari, ijtimoiy vazifasi va hozirgi zamon talablari asosida noyob brend konsepsiyasini ishlab chiqadi.

• OTMlarning ilmiy, ta’lim va innovatsion yutuqlaridan kelib chiqib logotipi va vizual identifikatsiyasi yaratiladi.

• Bu doirada suvenirlar, kanstovar mahsulotlari, sport kiyimlari, o‘yinchoqlar va boshqa atributika ishlab chiqariladi.

OTMlar uchun savdo shoxobchalari tashkil etiladi

• OTMlar o‘z logotipi va brendini aks ettiruvchi mahsulotlarni ishlab chiqaruvchi tashkilotlar bilan hamkorlik qiladi.

• Har bir OTMda brend mahsulotlarini sotadigan savdo shoxobchalari tashkil etilishi rejalashtirilgan.

Tanlovlar va chora-tadbirlar

Qaror loyihasiga ko‘ra:

• 2025-yil noyabr oyiga qadar OTM logotipi, tashrif qog‘ozi, madhiyasi va vizual identifikatsiyasi uchun tanlov e’lon qilinadi.

• Talabalar, professor-o‘qituvchilar va xodimlar uchun logotip tushirilgan maxsus kiyim va suvenir mahsulotlari ishlab chiqarish belgilangan.

Bu tashabbus har bir OTMning o‘ziga xos brendini yaratish va uni ommalashtirish orqali oliy ta’lim muassasalarining imijini mustahkamlashga qaratilgan.