O‘zbekistonning 3 universiteti THE Top 1000 reytingiga kirishga muvaffaq bo‘ldi!

O‘zbekiston universitetlari jahon reytingida: 3 ta oliygoh Top 1000 ro‘yxatida

22-yanvar kuni Buyuk Britaniyaning “Times Higher Education-THE” reyting tashkiloti “World University Rankings 2025 by Subject” fanlar bo‘yicha dunyoning eng nufuzli universitetlari ro‘yxatini e’lon qildi.

Ilk bor, O‘zbekistonning uchta oliy ta’lim muassasasi dunyo reytingida o‘z o‘rnini topdi. Quyida ushbu universitetlarning natijalari bilan tanishing:

1. Toshkent irrigatsiya va qishloq xo‘jaligini mexanizatsiyalash muhandislari instituti:

• Tabiiy fanlar, matematika va statistika: 301–400 o‘rinlar.
• Muhandislik: 501–600 o‘rinlar.

Mazkur natijalar institutning muhandislik va qishloq xo‘jaligi texnologiyalari sohasidagi innovatsion salohiyatini, shuningdek, tabiiy fanlar bo‘yicha tadqiqotlarning samaradorligini ko‘rsatadi.

2. Mirzo Ulug‘bek nomidagi O‘zbekiston Milliy universiteti:

• Tabiiy fanlar, matematika va statistika: 601–800 o‘rinlar.

Bu universitet tabiiy fanlar bo‘yicha ilmiy-tadqiqot salohiyati va boy ilmiy an’analarga ega ekanligini yana bir bor tasdiqlaydi.

3. Toshkent axborot texnologiyalari universiteti:

• Ta’lim: 601+ o‘rinlar.
• Kompyuter ilmlari va dasturlash texnologiyalari: 1001+ o‘rinlar.

Bu natijalar universitetning zamonaviy texnologiyalarni rivojlantirish, ta’limda ilg‘or yondashuvlarni joriy qilish va xalqaro miqyosdagi akademik tadqiqotlarda faol ishtirokini aks ettiradi.

Jahon miqyosidagi tan olinishi

Mazkur natijalar so‘nggi yillarda O‘zbekiston oliy ta’lim tizimiga, ayniqsa, muhandislik, tabiiy va aniq fanlarga qaratilayotgan e’tiborning xalqaro maydondagi yuksak samarasini ko‘rsatadi.