“Talaba guvohnomasi ID kartaga almashtiriladi” - oliy ta’lim vaziri

15-noyabr 21:57
“Talaba guvohnomasi ID kartaga almashtiriladi” - oliy ta’lim vaziri

Endi qog‘oz jurnal, reyting daftarcha bo‘lmaydi, talaba guvohnomasi ID kartaga almashtiriladi”, - dedi Abduqodir Toshqulov ta’lim sifati va kredit-modul tizimidagi muammolarga bag‘ishlangan videoselektor yig‘ilishida.

13 noyabr kuni oliy ta’lim vaziri Abduqodir Toshqulov rahbarligida oliy ta’lim muassasalarida ta’lim sifatini oshirish, kredit-modul tizimini tatbiq etishdagi muammolarga bag‘ishlangan yig‘ilish bo‘lib o‘tdi. Unda vazir oliy ta’limda raqamlashishga to‘xtaldi.

“Bugundan rektorlar kirishishi kerakki, O‘zbekiston oliy ta’lim tizimida jurnal, reyting daftarcha qog‘oz ko‘rinishda bo‘lmaydi. Talaba guvohnomasini ham ID kartaga o‘tkazish va unda barcha ma’lumotlar saqlanishi bo‘yicha budjet loyihasi o‘tdi. Bu ham muhokamada hozir”, — dedi Abduqodir Toshqulov.

Vazirning so‘zlariga ko‘ra endi har bir fakultetga kirganda ko‘zga tashlanib turuvchi, A1 va A2 formatdagi o‘quv prorektori tasdiqlagan dars jadvali — bu ko‘rsatkich emas.

“Vazir, mas’ullar borganida talaba smartfonini olib, uni ilovada ko‘rsatib berishi, dars jadvali uning telefonida bo‘lishi kerak”, — dedi u.

Vazir shuningdek, xorijlik hamkasblari oldida xijolat bo‘layotganini, chet ellik hamkasblari oldida — buni endi joriy qilyapmiz deyishga uyalayotganini ham ta’kidlagan.

Avvalroq, vazir ushbu yig‘ilishda OTMlardagi ta’lim sifati va kredit-modul tizimidagi asosiy muammolarga to‘xtalgani va bugungi mustaqil ta’limni tashkil etishda tizim va tushuncha yo‘qligi haqida gapirgani xabar qilingandi.